આંગળીને લાગી નવાઇ

Voting special

शाम-ए-महेफिल !

આજ આંગળીને લાગી નવાઇ
નવડાવી ધોવડાવી કીધી તૈયાર
ત્યારે મનમાં ને મનમાં હરખાઇ !

આટલું તો માન કદી મળતું નથી
ને કદી રાખતું નથી ય કોઇ ધ્યાન
આજે તો નખ સુધ્ધાં કાપીને આપ્યું છે
આંગળીને અદકેરું માન
હેન્ડક્રીમ લોશનથી રેલે સુગંધી
અેને પ્રીતેથી છે શણગારાઇ
આજ આંગળીને લાગી નવાઇ !

ન્હાઇ ધોઇને  એવી લાગે રુપાળી
છે આપણી ને તોય જાણે નૈં !
હાથને ય લાગે છે અડવાણું આજ 
હતી કાલે જે એ તો ક્યાં ગૈ ?
ટપકું આ કાળું છે એટલે કર્યું કે
મૂઇ જાય નહીં આજે નજરાઇ
આજ આંગળીને લાગી નવાઇ !
                
– તુષાર શુક્લ